Nasira Zuberi
teri mansha hai ḳhamoshi meri hai marzi avaz
aao mil kar aaj bana.en ham koi farzi avaz
chhagal bhi labrez hai ab to lekin meri gungi pyaas
teri ok se piina chahe ThanDe chashme ki avaz
kis ki ho zarḳhez sama.at kis ki banjar kya ma.alum
bhaTke har ik samt TaTole har rasta andhi avaz
dil se lab tak aate aate lafz badal jaate hain ab
pahle aa jaati thi honTon par ḳhalis sachchi avaz
ek se hain adab zaban-bandi ke har ik mahfil men
sabr ka jaam uTha ai dil aur ḳhamoshi se pi avaz
uzr usuul javaz ke charḳhe kaat raha hai har koi
tu bhi apni majburi ka dhaga le aur si avaz
vahi musalsal beach hamare ek masafat ki duuri
vaise har ik moḌ pe ruk ke us ne ham ko di avaz
zer-e-lab kuchh maang rahe the sab kashkol liye jis se
us ne phenki mere kaase men sab se unchi avaz
soch rahi huun naam pe apne chaunk ke pichhe muḌte hue
vahm tha mera ya phir sach-much teri hi vo thi avaz
gahri ḳhamoshi men bahte be-abad jaziron se
kis ne mera naam pukara kis ne mujh ko di avaz
Leave a Reply