raakh ke Dher pe kya sho.ala-bayani karte
ek qisse ki bhala kitni kahani karte
husn itna tha ki mumkin hi na thi ḳhud-nigari
ek imkan ki kab tak nigarani karte
shola-e-jan ko bujhate yunhi qatra qatra
ḳhud ko ham aag banate tujhe paani karte
phuul sa tujh ko mahakta hua rakhte shab bhar
apne sanson se tujhe raat ki raani karte
naddiyan dekhen to bas sharm se paani ho jaa.en
chashm-e-ḳhun-basta se paida vo ravani karte
sab se kahte ki ye qissa hai purana sahab
aah ki aanch se tasvir purani karte
dar-o-divar badalne men kahan ki mushkil
ghar jo hota to bhala naql-e-makani karte
koi aa jaata kabhi yunhi agar dil ke qarib
ham tira zikr pa.e-yad-dahani karte
sach to ye hai ki tire hijr ka ab ranj nahin
kya dikhave ke liye ashk-fishani karte
dil ko har lahza hi di aql pe ham ne tarjih
yar-e-jani ko kahan dushman-e-jani karte
shab isi tarah basar hoti hai meri ‘irfan’
harf-e-ḳhush-rang ko andoh-e-ma.ani karte
Leave a Reply