jaan nahin pahchan nahin hai
phir bhi to vo anjan nahin hai
har gham sahna aur ḳhush rahna
mushkil hai asan nahin hai
dil men jo mar jaa.e vo hai arman
jo nikle arman nahin hai
mujh ko ḳhushi ye hai ki ḳhushi ka
mujh pe koi ehsan nahin hai
ab na dikhana tabish-e-jalva
ab ankhon men jaan nahin hai
sab kuchh hai is daur-e-havas men
dil ka itminan nahin hai
ab ke ‘vaqar’ aise bichhḌe hain
milne ka imkan nahin hai
Leave a Reply