Zakir Khan Zakir
peT ki aag men barbad javani kar ke
panchhi lauTe hain abhi naql-e-makani kar ke
ḳhana-e-dil men ghaḌi-bhar ko Thaharna hai unhen
phir guzar ja.enge har baat purani kar ke
ishq iz.har ka talib hai na matlub-e-nazar
fa.eda kya hai miyan sho.ala-bayani kar ke
ab vahan ḳhaak uḌa karti hai armanon ki
ham chale aa.e the manzil pe nishani kar ke
paar lag ja.ega sanson ka safina ik roz
dhaḌkanon men tiri yadon se ravani kar ke
chand lamhon ka mira us ka safar tha aisa
raat ho jaise kahin shaam suhani kar ke
us ki nazron men haqiqat hai fasana ‘zakir’
chhoḌ ja.ega mujhe ab vo kahani kar ke
Leave a Reply