Kisi Din to Hamara Dard-E-Dil Soz-E-Jigar Dekho

Safi Aurangabadi

kisi din to hamara dard-e-dil soz-e-jigar dekho

kabhi to bhuul kar aao kabhi to puchh kar dekho

na dekho dost ban kar tum to dushman ki nazar dekho

ḳhafa ho kar bigaḌ kar ruuTh kar dekho magar dekho

nahin bharti tabi.at laakh dekho umr-bhar dekho

ḳhuda ki shaan hai aise bhi hote hain bashar dekho

kisi ko jab se dekha hai dikha.i kuchh nahin deta

hui meri nazar ko dosto kis ki nazar dekho

tarasti hain ye ankhen dekhne ko dil taḌapta hai

ziyada se ziyada muḳhtasar se muḳhtasar dekho

muqaddar se nibhi tum ek goya bhole-bhale the

koi zalim se zalim fitna-gar se fitna-gar dekho

kahi hain ham-nashino dil-lagi men tum ne jo baten

unhen sach-much pahunch jaa.e na ye jhuTi ḳhabar dekho

phir us par nukta-chin hai nukta-dan hai shaiḳh logon men

anaḌi paḌh raha hai duḳht-e-raz ko duḳht-e-zar dekho

koi betab koi mast koi chup koi hairan

tiri mahfil men goya ik tamasha hai jidhar dekho

tumhari bazm baat insaniyat ki phir raqibon men

bhare hain aadmi ki suraton ke janvar dekho

na ho jo banda-parvar bandagi ko bandagi us ki

janab-e-dil ḳhuda ravaq koi aur ghar dekho

nahin az-ru-e-qanun-e-mohabbat jurm-e-nazzara

to phir kyuun hain janab-e-dil agar dekho magar dekho

use dekha hai jis ke dekhne ko log marte hain

nazar baazu hamari bhi zara hadd-e-nazar dekho

safi’ ko sha.iri se mil ga.i har-dil-azizi bhi

darogh-e-maslahat-amez bhi hai kya hunar dekho