qaid men rahte hain jab tak bhi jiye jaate hain
halqe zanjir ke phir toḌ diye jaate hain
raunaqen chand sitaron ki liye jaate hain
chandni raat ko be-nur kiye jaate hain
ye tabassum na sahi husn ki saughat sahi
dard ko ek chamak aur diye jaate hain
ḳhaak hone pe bhi kam hota nahin jazba-e-ishq
raushni sham.a ki parvane liye jaate hain
surḳh ankhon se Tapak kar ye gulabi aansu
mere daman ko bhi rangin kiye jaate hain
Duub jaati hai savere hi se suraj ki kiran
jab sar-e-sham charaghon ke diye jaate hain
jin ko duniya men sambhalne ki ijazat na mili
zindagi bhar ke vo arman liye jaate hain
zindagi meri to ginti hai gareban ke shigaf
aap kyon daman-e-hasti ko siye jaate hain
saqiya rind to mohtat hain majbur nahin
aks mai-ḳhana ka ankhon men liye jaate hain
‘fazl’ aa.iin mohabbat ka badalne ke liye
ahl-e-dil kis liye majbur kiye jaate hain
Leave a Reply