Gham-E-Ishq Rah Gaya Hai Gham-E-Justuju Mein Dhal Kar

gham-e-ishq rah gaya hai gham-e-justuju men Dhal kar

vo nazar se chhup gae hain miri zindagi badal kar

tiri guftugu ko naseh dil-e-gham-zada se jal kar

abhi tak to sun raha tha magar ab sambhal sambhal kar

na mila suragh-e-manzil kabhi umr bhar kisi ko

nazar aa gai hai manzil kabhi do qadam hi chal kar

gham-e-umr-e-mukhtasar se abhi be-khabar hain kaliyan

na chaman men phenk dena kisi phuul ko masal kar

hain kisi ke muntazir ham magar ai umid-e-mubham

kahin vaqt rah na jaae yunhi karvaten badal kar

mire dil ko raas aaya na jumud-o-ghair-fani

mili rah-e-zindagani mujhe khaar se nikal kar

miri tez-gamiyon se nahin barq ko bhi nisbat

kahin kho na jaae duniya mire saath saath chal kar

kabhi yak-ba-yak tavajjoh kabhi dafatan taghaful

mujhe aazma raha hai koi rukh badal badal kar

hain ‘shakil’ zindagi men ye jo vusaten numayan

inhin vusaton se paida koi alam-e-ghazal kar

Leave a Comment