Anwar Anjum
koi sada na duur talak naqsh-e-pa koi
vo moḌ hai ki milta nahin rasta koi
haan dil ki dhaḌkanon se sada chhin lo magar
chup-chap hi jo aa ke yahan bas gaya koi
maana ki tere dar pe jhukin aa ke manzilen
par ham sa bhi mila tujhe sach sach bata, koi
dil ki zaban bahut hai koi ho jo ahl-e-dil
honTon se kya bata.e bhala mudda.a koi
ankhen jo band kiin to vo ubhre hain aftab
bahar ki dhuup se na raha vasta koi
hairan ho ke dil se ye puchha nigah ne
kya vaqa.i mila na tujhe ashna koi
ya asman tak nahin jaati miri nava
ya asman pe sunta nahin hai nava koi
jitne ḳhayal utne hi rangon ke da.ere
milta nahin kisi se kahin silsila koi
us sada-dil ko kya ḳhabar is unch-nich ki
‘anjum’ ke paas ja ke bane kya baḌa koi
Leave a Reply