Wali Mohammad Wali
vo naznin ada men ejaaz hai sarapa
khubi men gul-rukhan suun mumtaz hai sarapa
ai shokh tujh nayan men dekha nigah kar kar
ashiq ke marne ka andaz hai sarapa
jag ke ada-shanasan hai jin ki fikr aali
tujh qad kuun dekh bole yu naaz hai sarapa
kyuun ho saken jagat ke dilbar tire barabar
tu husn haur ada men ejaaz hai sarapa
gaahe ai isvi-dam yak baat lutf suun kar
jan-bakhsh mujh ko tera avaz hai sarapa
mujh par ‘vali’ hamesha dildar mehrban hai
har-chand hasb-e-zahir tannaz hai sarapa
Leave a Reply