Faisal Nadeem Faisal
kuchh saliqe se agar chaak ghumaya jaata
ain mumkin hai ki shahkar banaya jaata
jaane vaale ne ghalat fahmi men lauT aana tha
be-ḳhayali men bhi gar haath hilaya jaata
ishq mansur ko ḳhud daar talak le aaya
is se pahle ki koi hashr uThaya jaata
lauTne vaala isi soch men mar ja.ega
kaash zanjir ko do baar hilaya jaata
rang bharne men musavvir ne riya-kari ki
varna tasvir ko mandir men lagaya jaata
is men vahshat hai aziyyat hai zabun-hali hai
ab ye kirdar nahin mujh se nibhaya jaata
aap to shakl se lagte hain adakar mujhe
aap jaison ko nahin dost banaya jaata
avvalin ḳhat ko jala kar vo gunahgar hua
kaash tazim se dariya men bahaya jaata
main ne badli hain rivayat purani varna
main bhi ‘faisal’ kisi paTri se uThaya jaata
Leave a Reply