malbus-e-ghubar yaad rakhna
ye rahguzar yaad rakhna
ik sham-e-ḳhizan yahin kahin hai
ai sub.h-e-bahar yaad rakhna
ham kashti-e-ishq ke musafir
utre nahin paar yaad rakhna
ai zaḳhma-varan-e-barbat-e-dil
TuuTe hue taar yaad rakhna
patjhaḌ ki hava.en chiḳhti hain
kya saut-e-hazar yaad rakhna
ham jaate hain bar-e-gham uTha.e
ai shahr-e-nigar yaad rakhna
ibrat ka maqam hai ye duniya
viran dayar yaad rakhna
ai vadi-e-gul ko jaane vaale
raston ke ye ḳhaar yaad rakhna
milti hai ghamon se bhi basirat
zaḳhmon ka shumar yaad rakhna
bachpan ke makan ka naḳhl-e-hamraz
ye haar singhar yaad rakhna
ye harf hai raushni-e-farda
harf sar-e-dar yaad rakhna
shayad main ye ḳhvab bhuul ja.un
tum ai mire yaar yaad rakhna
Leave a Reply