main kal tanha tha ḳhilqat so rahi thi
mujhe ḳhud se bhi vahshat ho rahi thi
use jakḌa hua tha zindagi ne
sirhane maut baiThi ro rahi thi
khula mujh par ki meri ḳhush-nasibi
mire raste men kanTe bo rahi thi
mujhe bhi na-rasa.i ka samar de
mujhe teri tamanna jo rahi thi
mira qatil mire andar chhupa tha
magar bad-nam ḳhilqat ho rahi thi
baghavat kar ke ḳhud apne lahu se
ghulami daagh apne dho rahi thi
labon par tha sukut-e-marg lekin
mire dil men qayamat so rahi thi
ba-juz mauj-e-fana duniya men ‘mohsin’
hamari justuju kis ko rahi thi
Leave a Reply