Sirhane Bebasi Roti Rahi Hai

Zafar Ansari Zafar

sirhane bebasi roti rahi hai

shab-e-gham zindagi roti rahi hai

shab-e-gham saneha kya ho gaya tha

bahr-su chandni roti rahi hai

ye meri shumi-e-qismat pe yaaro

sahar tak sham.a bhi roti rahi hai

miri be-chargi par bazm-e-anjum

kabhi hansti kabhi roti rahi hai

gulon ki muskurahaT yaad kar ke

gulistan men kali roti rahi hai

ḳhalish hoti hai patthar ke bhi dil men

buton ki aankh bhi roti rahi hai

tumhen kya hai ḳhabar tanha.iyon men

sitamgar ki gali roti rahi hai

faqat ankhen nahin furqat ki shab men

hamari ruuh bhi roti rahi hai

‘zafar’ jab se hua tark-e-ta.alluq

hamari sha.eri roti rahi hai