Kafeel Aazar Amrohvi
sukun thoḌa sa paaya dhuup ke ThanDe makanon men
bahut jalne laga tha jism barfili chaTanon men
kab aaoge ye ghar ne mujh se chalte vaqt puchha tha
yahi avaz ab tak gunjti hai mere kanon men
janaza meri tanha.i ka le kar log jab nikle
main ḳhud shamil tha apni zindagi ke nauha-ḳhvanon men
miri mahrumiyan jab pattharon ke shahr se guzrin
chhupaya sar tiri yadon ke TuuTe sa.ebanon men
mujhe meri ana ke ḳhanjaron ne qatl kar Daala
bahana ye bhi ik bechargi ka tha bahanon men
tamasha ham bhi apni bebasi ka dekh lete hain
tiri yadon ke phulon ko saja kar phul-danon men
zamin pairon ke chhale roz chun leti hai palkon se
taḳhayyul roz le uḌta hai mujh ko asmanon men
main apne-ap se har dam ḳhafa rahta huun yuun ‘azar’
purani dushmani ho jis tarah do ḳhandanon men
Leave a Reply