Taskin-E-Iztirab-E-Tamanna Na Kijiye

Shadan Indauri

taskin-e-iztirab-e-tamanna na kijiye

mujh se juda abhi miri duniya na kijiye

divana-e-fareb-e-tamanna na kijiye

meri taraf se mujh ko pukara na kijiye

kuchh duur chalne dijiye ab ḳhud hi ishq ko

har har qadam pe aap ishara na kijiye

dil ke siva tamam kitab-e-hayat men

ik lafz bhi nahin jise afsana kijiye

uThte hain jab junun men gareban ki samt haath

kahta hai koi jaise ki rusva na kijiye

dil to taḌap uThega jo mujh ko ḳhabar na ho

chhup kar mere qarib se guzra na kijiye

‘shadan’ thame hamare to aansu na aaj tak

jab se vo kah ga.e hain ki roya na kijiye