Nazeer Banarasi
nigah o dil bhi qadam ki tarah mila ke chale
kis ittihad se raahi rah-e-vafa ke chale
vahan se ro ke uThe aur muskura ke chale
bala ka gham tha hamin the ki gham chhupa ke chale
fasurda-dil the magar bazm ko hansa ke chale
kali na tum se khili ham chaman ḳhala ke chale
lipaT na jaa.e kahin raah pa-e-nazuk se
ye aap haath se daman kahan chhuḌa ke chale
tumhin ne dil ke andhere ko di ziya-e-umid
tumhin gharib ke ghar ka diya bujha ke chale
kisi ko dekhte dekha udaas ho ga.e tum
nazar hai koi kahan tak bacha bacha ke chale
‘nazir’ huun vo sharabi ba-faiz-e-pir-e-mughan
nigah Daal duun jis par vo laḌkhaḌa ke chale
Leave a Reply