qalaq aa gaya iztirab aa gaya
ye dil kya gaya ik azaab aa gaya
lifafe men purze mire ḳhat ke hain
mire ḳhat ka aḳhir javab aa gaya
idhar baḌhte baḌhte baḌha dast-e-shauq
udhar aate aate hijab aa gaya
kaha us ne dekha jo dar par mujhe
kahan se ye ḳhana-ḳharab aa gaya
jabin pur-shikan hai nigah sho.ala-rez
ye kaun aaj zer-e-itab aa gaya
sikandar nasibe ka hai vo faqir
tire dar se jo kamyab aa gaya
ye aalam hua tabish-e-husn se
sava neze par aftab aa gaya
hue hi the amada tauba pe ham
ki gardish men jam-e-sharab aa gaya
hui qa.il-e-jalva-e-tur ḳhalq
sar-e-bam vo be-naqab aa gaya
ye kya kam hai ai shaiḳh mai ka javaz
vo ka.abe se uTh kar sahab aa gaya
uTha.e ga.e bazm se bul-havas
unhen sheva-e-intiḳhab aa gaya
adu saath rahne lage ai ‘vafa’
gahan men mira aftab aa gaya
Leave a Reply