Koi Din Ka Aab-O-Dana Aur Hai

koi din ka ab-o-dana aur hai

phir chaman aur ashiyana aur hai

haan dil-e-be-tab chande intizar

amn-o-rahat ka thikana aur hai

shama phiki raat kam mahfil udaas

ab mughanni ka tarana aur hai

ai javani tu kahani ho gai

ham nahin vo ya zamana aur hai

jis ko jan-e-zindagani kah saken

vo hayat-e-javedana aur hai

jis ko sun kar zohra-e-sang aab ho

aah vo ghamgin fasana aur hai

va agar sama-e-raza ho to kahun

ek pand-e-mushfiqana aur hai

ittifaqi hai yahan ka irtibat

sab hain begane yagana aur hai

Leave a Comment