Dattatriya Kaifi
ik ḳhvab ka ḳhayal hai duniya kahen jise
hai is men ik tilism tamanna kahen jise
ik shakl hai tafannun-e-taba-e-jamal ki
is se ziyada kuchh nahin duniya kahen jise
ḳhamyaza hai karishma-parasti-e-dahr ka
ahl-e-zamana alam-e-uqba kahen jise
ik ashk armida-e-zabt-e-gham-e-firaq
mauj-e-hava-e-shauq hai dariya kahen jise
ba-vasf-e-zabt-e-raz mohabbat hai ashkar
uqda hai dil ka aqd-e-surayya kahen jise
barham-zan-e-hijab hai ḳhud-raftagi-e-husn
ik shan-e-be-ḳhudi hai zuleḳha kahen jise
aks-e-safa-e-qalb ka jauhar hai a.ina
varafta-e-jamal ḳhud-ara kahen jise
ram-sheva hai sanam to hai ram-ashna ye dil
hasil hai mujh ko aish muhayya kahen jise
ḳhuni kafan ye saint ke rakkha hai kis liye
qatil vo hai ki rashk-e-masiha kahen jise
sab kuchh hai aur kuchh bhi nahin dahr ka vajud
‘kaifi’ ye baat vo hai muamma kahen jise
Leave a Reply