Ezaz Afzal
har ek gaam pe asudgi khaḌi hogi
safar ki aḳhiri manzil bahut kaḌi hogi
ye apne ḳhuun ki lahron men Dubti kashti
bhanvar se bhaag ke sahil pe ja paḌi hogi
musafiro ye ḳhalish nok-e-ḳhar ki to nahin
zarur paanv tale koi pankhuḌi hogi
tire ḳhulus-e-tahaffuz men shak nahin lekin
hava men ret ki divar gir paḌi hogi
nizam-e-qaid-e-musalsal men kaisi azadi
khule jo paanv to hathon men hathkaḌi hogi
tire farar ki sarhad qarib thi lekin
miri talash zara duur ja paḌi hogi
tumhare daur-e-musalsal ki munzabit tariḳh
hamare raqs-e-musalsal ki ik kaḌi hogi
mire guman ki buniyad khokhli nikli
tire yaqin ki imarat kahan khaḌi hogi
Leave a Reply