mere qadmon par nigun mera hi sar hai bhi to kya
mere saa.e ki ye sazish kargar hai bhi to kya
teri ḳhush-fahmi ke is a.ina-e-sad-rang men
aks chehre se siva jazib-nazar hai bhi to kya
apne markaz se juda ho kar agar ye fikr-e-nau
da.era-dar-da.era garm-e-safar hai bhi to kya
zahr ki kohna rivayat hi ka Dar Das ja.ega
jism se lipTi ye nagin be-zarar hai bhi to kya
mehrban qatron ki barish abr-e-a.inda men hai
fasl-e-imkan ab ke mausam be-samar hai bhi to kya
sair-e-la-samti se bhi la-hasili ka lutf le
reg-e-sahra be-sada o be-samar hai bhi to kya
Leave a Reply