apni tarah mujhe bhi zamane men aam kar
ai zat-e-ambarin mujhe ḳhushbu maqam kar
un pattharon ko raakh na kar soz-e-nutq se
mujh se kalam kar kabhi mujh se kalam kar
sadiyon ki main kashid huun ai saqi-e-azal
mere vajud ko bhi kabhi sarf-e-jam kar
azad ho chuka huun main qaid-e-havas se
bam-e-nazar se ab mira baala maqam kar
mujh ko nishan-e-saltanat-e-be-nishan de
duniya-e-nam-o-nang ko be-nang-o-nam kar
saara nizam-e-shams kahin ye bujha na de
is soḳhta kiran ka koi intizam kar
aalam men hai sabat faqat meri ruuh ko
mujh men sama ke ab koi kar-e-davam kar
koi makin-e-qarya-e-jan tu bhi DhunDh le
tu bhi ‘rashid’ aaj kisi ko salam kar
Leave a Reply