jis men na ḳhushi ho vo mohabbat nahin achchhi
kulfat se jo ḳhali ho vo rahat nahin achchhi
kahta hai hasinon ki mohabbat nahin achchhi
aur naseh-e-kam-fahm ye aadat nahin achchhi
tum par jo na aa jaa.e to vo dil nahin achchha
tum par jo na maa.il ho tabi.at nahin achchhi
be-dil liye dete ho jo tum ghairon ko bose
nuqsan hai is men ye muravvat nahin achchhi
dilva.en mujhe galiyan ghairon se sar-e-bazm
o shoḳh ye dar-parda shararat nahin achchhi
divane nahin ham jo giraftar-e-bala hon
vaqif hain ki in zulfon ki ulfat nahin achchhi
‘sabir’ ne sar-e-bazm jo chheḌa to vo bole
kambaḳht yahi to tiri aadat nahin achchhi
‘sabir’ shajar-e-ḳhushk se ummid-e-samar kya
jo faiz se ḳhali ho vo ḳhidmat nahin achchhi
Leave a Reply