tamam rasta phulon bhara tumhara tha
hamari raah men bas naqsh-e-pa hamara tha
us ek sa.at-e-shab ka ḳhumar yaad karen
badan ke lams ko jab ham ne mil ke banTa tha
vo ek lamha jise tum ne chhu ke chhoḌ diya
us ek lamhe men kaif-e-visal saara tha
phir is ke ba.ad nigahon ne kuchh nahin dekha
na jaane kaun tha jo samne se guzra tha
ab us ke naam pe dil ne dhḌakna chhoḌ diya
vo jis ko ham ne kabhi be-hisab chaha tha
vo jis ko dekha tha akasr hujum-e-yaran men
vo ek shaḳhs bahut un dinon akela tha
tamam saut-o-sada chup se ho ga.e the ‘zubair’
vo jab sukut ke patthar pe gir ke TuuTa tha
Leave a Reply