Ek Chup Khae Gai Hai Mujhko

Sarwat Zehra

ek chup khaa.e ga.i hai mujh ko

agahi Dhaa.e ga.i hai mujh ko

zindagi mere sanvarne ke liye

dard pahna.e ga.i hai mujh ko

be-ḳhudi aap talak laa.i thi

so vahi laa.e ga.i hai mujh ko

aap ne raakh kiya uḌne ko

ḳhaak dafna.e ga.i hai mujh ko

mere idrak ki majburi se

baat bahla.e ga.i hai mujh ko

chand is taur se utra shab men

raat gahna.e ga.i hai mujh ko