Poet
sauda tumhare ishq ka jis din se sar men hai
sare-jahan ka dard hamare jigar men hai
marne ki aarzu bhi nikal ja.egi kabhi
aisa kahan ki bair dua-o-asar men hai
josh-e-junun ko kis liye sahra ki hai talash
sar phoḌne ka lutf to divar-o-dar men hai
har halqa-e-ḳhayal hai tasvir-e-ru-e-dost
afsun-e-intizar ye kaisa nazar men hai
ai dil tavalat-e-shab-e-furqat ka kya gila
nadan farq bhi koi sham-o-sahar men hai
is gardish-e-mudam se ghabra.en kis liye
ik halqa-e-junun hai jo daur-e-qamar men hai
sajdon ne farq-e-naqsh-e-qadam bhi miTa diya
aisa bhi ik maqam tiri rahguzar men hai
dil de chuke hain jaan bhi ab de ke dekh len
ik imtihan ye bhi hamari nazar men hai
kah do shamim ghuncha-e-taza-shagufta se
bu-e-charagh-e-kusta bhi bad-e-sahar men hai
Leave a Reply