yahi kahti laili-e-sokhta-jan nahin khati adab se khuda ki qasam
gham-e-qais siva mujhe gham nahin kuchh usi kushta-e-naz-o-ada ki qasam
kabhi kahta tha qais ghazalon se ja kaho naaqa yaan se kidhar ko gaya
kabhi kahta tha tu hi batae saba tujhe laila ki zulf-e-dota ki qasam
tire kushta-e-gham ka hai haal batar yahi kahiyo jo jaana ho tera udhar
tujhe qasid-e-mauj-e-nasim-e-sahar miri hijr ki shab ki buka ki qasam
aai ‘havas’ mujhe phulon ki bu kabhi baitha na ja ke main bar-lab-e-ju
miri tangi-e-dil to gai na kabhu mujhe bagh-e-jahan ke faza ki qasam