Poet
gae hain jab se vo uth ke yaan se hai haal bahar mira bayan se
kahe koi itna jan-e-jan se milo nahin to gaya men jaan se
jo kuchh guzarta hai mere dil par sunaun kis ko vo haae dilbar
khuda kare phir vo din mayassar kahun main apni hi sab zaban se
kabhi khafa ho ke baat karna kabhi vo kah kah ke phir mukarna
phir ulta bohtan mujh pe dharna ye tarz tum ne liya kahan se
kabhi tire gham men mujh ko rona kabhi phir aaphi hai chupke hona
jo yaad aata hai saath sona to raat katti hai kis fughan se
ghadi ghadi hijr ki hai bahari dikhae surat khuda tumhari
sunun vo baten piyari piyari ajab ada se ajab bayan se
tira khafa ho ke ruuth jaana vo minnaton se mira manana
vo apni apni si kuchh sunana vo baten bhi aap dil-sitan se
ajab hi dushman se dosti ki ki shakl ab hai ye zindagi ki
labon pe chakki hai jan-kani ki pade hain behosh nim-jan se
kaha kuchh us ne yahan kisi se ye baat qasid nahin hansi se
guman hota hai aur hi se tire ulajhte hue bayan se
‘nizam’ kyuun tu ne us ko chaha ye dil men kya thi jo dil lagaya
jo deve taufiq kuchh bhi maula to ab na milna kabhi butan se
Leave a Reply