Mushafi Ghulam Hamdani
aah dekhi thi main jis ghar men pari ki surat
ab nazar aae hai vaan nauhagari ki surat
na vo andaz na avaz na ishva na ada
yak-ba-yak mit gai yuun jalvagari ki surat
ab khayal us ka vahan ankhon men phirta hai miri
koi phirta tha jahan kabk-e-dari ki surat
us ke jaane se mira dil hai mire siine men
dam ka mehman charagh-e-sahari ki surat
ne khabar us ko miri pahunche hai ne us ki mujhe
bandh gai hai ajab ik be-khabari ki surat
naam luun kis ka ki ik gul ke liye jaate hain
ashk ankhon se aqiq-e-jigari ki surat
‘mushafi’ hai yahi ab soch ki dekhen to falak
phir bhi dikhlaega yar-e-safari ki surat
Leave a Reply