dar-e-mai-kada hai khula hua sar-e-charḳh aaj ghaTa bhi hai
chale daur-e-saqi-e-dilruba ki chaman men raqs-e-saba bhi hai
gham-e-zindagi sahi jan-gusil magar is se koi bacha bhi hai
yahi gham hai raz-e-nashat-e-dil yahi zindagi ka maza bhi hai
yahi zaḳhm-e-dil jo nasib hai yahi soz-e-dil ka naqib hai
ye mire ḳhulus ka rang hai kisi naznin ki ata bhi hai
hai miri nigah men sirf tu kisi aur ki nahin justuju
tire iltifat ki aarzu tiri be-ruḳhi ka gila bhi hai
mujhe kya uḌa.enge bal-o-par ki qafas men umr hui basar
main riha hua bhi kabhi agar to riha.i meri saza bhi hai
miri dastan bhi ajiib hai ye kisi kisi ka nasib hai
kahin zikr-e-bad-e-sumum hai kahin zikr-e-mauj-e-saba bhi hai
na tu uzv-e-jah pe faḳhr kar ki ye zindagi to hai ik safar
tujhe kya ḳhabar are be-ḳhabar dabe paanv pichhe qaza bhi hai
jo bahar fasl-e-shabab thi vo misal-e-abr guzar ga.i
nahin zindagi men koi ḳhushi ki ḳhilaf mere hava bhi hai
vo ba-zo.am-e-husn hain ḳhud-nigar to mujhe bhi naaz hai ishq par
main niyaz-mand sahi magar mujhe ‘soz’ pas-e-ana bhi hai
Leave a Reply