Shagufta Shafiq
mere to ghar men rahte hain mausam kamal ke
allah kare na aa.en kabhi din zaval ke
itna baḌa kiya hai usi ne to paal ke
aane na de jo paas mire din malal ke
ik yaad teri saath thi ab vo bhi Dhal ga.i
qisse purane ho ga.e mere gulal ke
dil ko bahut sukun use dekh ke mila
ḳhush-bash hain vo ḳhuub mujhe bhul-bhal ke
duniya ki baat chhoḌiye qissa ye ghar ka hai
din ja chuke hain lauT ke ranj-o-malal ke
aansu baha ke baap ne beTe se ye kaha
kya mil gaya tujhe miri pagḌi uchhal ke
main sochti huun kaisi ‘shagufta’ ye baat hai
ab to pahaḌ ban gaya gham paal paal ke
Leave a Reply