Zafar Iqbal Zafar
vo nahin us ki magar jadugari maujud hai
ik sahar-alud mujh men be-ḳhudi maujud hai
saf-ba-saf dushman hi dushman hain mire charon taraf
hausla dekho ki phir bhi zindagi maujud hai
bujh ga.i hai bastiyon ki aag ik muddat hui
zehn men lekin abhi tak sho.alagi maujud hai
bad-e-sarsar chal rahi hai aur us ke bavajud
phir bhi sham.on men abhi tak raushni maujud hai
hai ajab e.ajaz ye us ki mohabbat ka ‘zafar’
jagti ankhon men ḳhvab-e-zindagi maujud hai
Leave a Reply