basti se thodi duur chattanon ke darmiyan
thahra hua hai khana-ba-doshon ka karvan
un ki kahin zamin na un ka kahin makan
phirte hain yunhi shaam o sahar zer-e-asman
dhuup aur abr-o-bar ke maare hue gharib
ye log vo hain jin ko ghulami nahin nasib
is karvan men tifl bhi hain naujavan bhi hain
budhe bhi hain mariz bhi hain na-tavan bhi hain
maile phate libas men kuchh deviyan bhi hain
sab zindagi se tang bhi hain sargiran bhi hain
be-zar zindagi se hain piir o javan sabhi
altaf-e-shahryar ke hain nauha-khvan sabhi
mathe pe sakht-koshi-e-paiham ki dastan
ankhon men huzn o yaas ki ghanghor badliyan
chehron pe tazyana-e-iflas ke nishan
har har ada se bhuuk ki betabiyan ayaan
paisa agar mile to hamiyat bhi bech den
roti ka aasra ho to izzat bhi bech den
utthe hain jis ki god se aazar vo qaum hai
tode hain jis ne charkh se akhtar vo qaum hai
palte hain jis ne dahr ke daftar vo qaum hai
paida kiye hain jis ne payambar vo qaum hai
ab kyuun sharik-e-halqa-e-nau-e-bashar nahin
insan hi to hain ye koi janvar nahin
akhir zamana un ko sataega kab talak
kab se jala raha hai jalaega kab talak
kab se mita raha hai mitaega kab talak
un ke lahu ko josh na aaega kab talak
mayusiyon ki tah men junun-kheziyan bhi hain
aflas ki sarisht men khun-reziyan bhi hain
Leave a Reply