Qaisarul Jafri
apni tanha.i ki palkon ko bhigo luun pahle
phir ghazal tujh pe likhun baiTh ke ro luun pahle
ḳhvab ke saath kahin kho na ga.i ho ankhen
jab uThun so ke to chehre ko TaTolun pahle
mere ḳhvabon ko hai mausam pe bharosa kitna
ba.ad men phuul khilen haar piro luun pahle
dekhna hai vo ḳhafa rahta hai mujh se kab tak
main ne socha hai ki is baar na bolun pahle
doston ne mujhe vo daagh diye hain ‘qaisar’
vo bhi aa jaa.en to darvaza na kholun pahle
Leave a Reply