hamare dil pe jo zaḳhmon ka baab likkha hai
isi men vaqt ka saara hisab likkha hai
kuchh aur kaam to ham se na ho saka lekin
tumhare hijr ka ik ik azaab likkha hai
suluk nashtaron jaisa na kijiye ham se
hamesha aap ko ham ne gulab likkha hai
tire vajud ko mahsus umr bhar hoga
tire labon pe jo ham ne javab likkha hai
hua fasad to is men nahin kisi ka qusur
hava-e-shahr ne mausam ḳharab likkha hai
agar yaqin nahin to uTha.iye tariḳh
hamara naam ba-sad-ab-o-tab likkha hai
Leave a Reply