baat karne ki shab-e-vasl ijazat de do
mujh ko dam bhar ke liye ghair ki qismat de do
tum ko ulfat nahin mujh se ye kaha tha main ne
hans ke farmate hain tum apni mohabbat de do
ham hi chuke sahar-e-vasl manana hi na tha
ab hai ye hukm ki jaane ki ijazat de do
muft lete bhi nahin pher ke dete bhi nahin
yuun sahi ḳhair ki dil ki hamen qimat de do
kam nahin pir-e-ḳharabat-nashin se ‘beḳhud’
mai-kasho to use mai-ḳhane ki ḳhidmat de do
Leave a Reply