qadam qadam pe kisi imtihan ki zad men hai
zamin ab bhi kahin asman ki zad men hai
har ek gaam ulajhta huun apne aap se main
vo tiir huun jo khud apni kaman ki zad men hai
vo bahr huun jo khud apne kinare chatta hai
vo lahar huun ki jo sail-e-ravan ki zad men hai
main apni zaat pe israr kar raha huun magar
yaqin ka khel musalsal guman ki zad men hai
mire vajud ke andar utarta jaata hai
hai koi zahr jo meri zaban ki zad men hai
lagi hui hai nazar aane vaale manzar par
magar ye dil ki abhi raftagan ki zad men hai
yahi nahin ki faqat rizq-e-khvab band hua
gada-e-ku-e-hunar bhi sagan ki zad men hai
ufuq ufuq jo mire nuur ka ghubar uda
ye kaenat mire khak-dan ki zad men hai
Leave a Reply