tamasha rahguzar-dar-rahguzar afsos ka hai
bhale hi ḳhush hain sab lekin safar afsos ka hai
bahishti baagh ki sab titliyan hain par-burida
shikasta rang ta-hadd-e-nazar afsos ka hai
abhi itra rahe hain ssakinan-e-qasr-shahi
abhi ankhon se un ke mahv ghar afsos ka hai
haveli ab kahan jo qahqahon se gunjti thi
jahan tak dekhta huun main khanDar afsos ka hai
kahan mumkin tire ishrat-kade men shaam kaTen
abhi to samna har gaam par afsos ka hai
azizo aao ab ik al-vida.i jashn kar len
ki is ke ba.ad ik lamba safar afsos ka hai
Leave a Reply