Poet
vaqt ke kaan kaun bhar raha hai
vaqt vaise bhi to guzar raha hai
saal do chaar pichhe ho ga.e hain
aa.ina dekh kar sanvar raha hai
kaun rahta hai paar dariya ke
ye jo paani hai kyon biphar raha hai
ye udasi bhi be-sabab to nahin
dil kisi justuju men mar raha hai
thaam kar haath mera hathon men
baat be-bat kyon mukar raha hai
duur hi rahiye dur-tar rahiye
aap se kaun baat kar raha hai
mera saaya bhi mere saath nahin
kya koi mera ham-safar raha hai
kitne baune hue hain vo sabit
ḳhabt jin ka hamare sar raha hai
ek vahshat ka baab ḳhatm hua
ek nashsha tha jo utar raha hai
Leave a Reply