Havi Momin Abadi
kaliyon ko mere phuul mire ashiyan ko
taaḌa hai sa.iqon ne mire gulistan ko
ik ḳhana-e-ḳhuda tujhe saunpa tha ai sanam
karta hai kaun tark phir aise makan ko
tuba-qadan-e-shahar-e-karachi ne sar-basar
sar par uTha ke rakkha hai is asman ko
pir-e-falak hai siine men patthar tira ki dil
kal ḳhaak men mila diya kaise javan ko
jannat dikha di shaiḳh ko saaqi ne jiite ji
hazrat salam kar ga.e pir-e-mughan ko
jhuTi sahi mili hai mohabbat mujhe zarur
abad rakhe haq mire in dostan ko
kya kya zabanon ko liye daman men baiThi hai
ya-rab ata hon vus.aten urdu zaban ko
Leave a Reply