jo nazar se bayan hoti hai
kya hasin dastan hoti hai
pattharon ko na Thokaren maaro
pattharon men bhi jaan hoti hai
jis ko chhu do tum apne qadmon se
vo zamin asman hoti hai
be-piye bhi surur hota hai
jab mohabbat javan hoti hai
zindagi to usi ki hai jis par
vo nazar mehrban hoti hai
jitne unche ḳhayal hote hain
utni unchi uḌaan hoti hai
aarzu ki zaban nahin hoti
aarzu be-zaban hoti hai
jis men shamil ho talḳhi-e-gham bhi
kitni miThi vo taan hoti hai
in ki nazron ka ho fusun jis men
vo ghazal ki zaban hoti hai
ḳhaar ki zindagi-e-be-raunaq
phuul ki pasban hoti hai
kaun deta hai ruuh ko avaz
jab haram men azaan hoti hai
ishq ki zindagi ‘hafiz’ na puchh
har ghaḌi imtihan hoti hai
Leave a Reply