dard se jaan churate hue Dar lagta hai
dil ko viran banate hue Dar lagta hai
chaar aansu sar-e-mizhgan to koi baar nahin
gham ki tauqir ghaTate hue Dar lagta hai
log to baat ka afsana bana dete hain
is liye lab bhi hilate hue Dar lagta hai
apni hasti se na ho ja.un kahin begana
aap se rabt baḌhate hue Dar lagta hai
husn-e-be-parda ke jalve bahut arzan hain magar
tohmat-e-did uThate hue Dar lagta hai
azmat-e-dair-o-haram ka na bharam khul jaa.e
sar tire dar pe jhukate hue Dar lagta hai
jis ke har lafz men hon gham ki karahen ‘mansha’
aisa afsana sunate hue Dar lagta hai
Leave a Reply