Titli Qafas Mein Qaid-E-Saba Dhundhti Rahi

titli qafas men qaid-e-saba DhunDhti rahi

main shahr-e-nang men bhi rida DhunDhti rahi

vo titliyon men mast bahut mutmain sa tha

jis ko chaman men meri sada DhunDhti rahi

rut ki tarah mizaj badal kar chala gaya

vo bevafa tha us men vafa DhunDhti rahi

takht-e-munafiqat pe vahi hukmaran tha

bahr-e-khulus jis ko sada DhunDhti rahi

josh-e-junun ke haath jise daan kar chuki

phir main zaruratan vo ana DhunDhti rahi

dil par lage jo zakhm kahan mundamil hue

main shahr shahr phirti dava DhunDhti rahi

basti men ek bhi na vafadar mil saka

main dar-ba-dar bhatakti vafa DhunDhti rahi

sail-e-bala bhanvar men jahan chhod kar gaya

main nakhuda ke saath khuda DhunDhti rahi

divar-e-dil se meri chura ke vo le gaya

jagmag si raushni vo diya DhunDhti rahi

meri hatheliyon pe rache zakhm zakhm rang

‘bano’ main in men bu-e-hina DhunDhti rahi

Leave a Comment