ankhon men vo aa.en to hansate hain mujhe ḳhvab
har roz na.e baagh dikhate hain mujhe ḳhvab
ab pyaar ke mausam ka hai aghaz yaqinan
naghmat na.e ḳhuub sunate hain mujhe ḳhvab
ho niind pe chhaya hua jab fikr ka badal
ik sair na.i samt karate hain mujhe ḳhvab
us ziist ki talḳhi se to achchhi hai miri niind
titli kabhi phulon se milate hain mujhe ḳhvab
ik dard ka ehsas jagane ke liye hi
phulon ki tarah ḳhaar ke aate hain mujhe ḳhvab
milte hain dukhane ko mira dil hi ka.i log
phir dard ke sahra men sulate hain mujhe ḳhvab
vo log ‘sabila’ ke jo bichhḌe hain safar men
aksar unhin ki yaad dilate hain mujhe ḳhvab
Leave a Reply