Shahida Hasan
chand ke saath jal uthi main bhi
der tak baam par rahi main bhi
kya hua dhal rahi hai shaam agar
hai vahi tu abhi vahi main bhi
tu jo bhula to main bhi bhuul gai
varna bhuli na thi kabhi main bhi
lab-e-divar-o-dar to pathar the
tere aage khamosh thi main bhi
kis ko maalum teri raton men
ik sitara bani rahi main bhi
be-zarurat tiri panah men huun
itni be-khanuman na thi main bhi
jazba-e-ishq ki farakh-dili
tu jhuka tha to jhuk gai main bhi
chhanv men huun abhi duaon ki
huun kisi god ki pali main bhi
Leave a Reply