husn achchha hai mohammad ka kamal achchha hai
jo ḳhuda ko bhi hai pyara vo jamal achchha hai
bazm-e-kaunain murattab hui teri ḳhatir
vaqt hai tere liye is men jo maal achchha hai
mujh se puchhe to koi tere ghulamon ka uruuj
badshahon se bhi rutbe men bilal achchha hai
gham uThane ki hai aadat miri tab-e-sani
main to kahta huun ki duniya men malal achchha hai
qissa-e-tur se vaqif hai zamana saara
koi kis munh se kahe shauq-e-jamal achchha hai
bazm men dekh ke hasrat se kisi ko chup huun
dar-haqiqat yahi andaz-e-saval achchha hai
jis men ik din bhi mayassar ho mulaqat ki raat
mere nazdik to vo maah vo saal achchha hai
lutf deta hai mujhe tera tasavvur shab-e-gham
sach kaha karte hain achchhon ka ḳhayal achchha hai
jab se dekhe hain tumhare lab-o-abru ham ne
na kaha hai na kahenge ki hilal achchha hai
tujh se haT kar kahin paḌti hi nahin meri nazar
yuun to yusuf ka bhi hone ko jamal achchha hai
ashiqon ke liye kis kaam ka hai sabr-o-qarar
jo tire gham men rahe muztarib haal achchha hai
us ne dekha hi nahin qamat-e-zeba tera
jo ye kahta ho ki gulshan men nihal achchha hai
phir vahi zikr hai arbab-e-karam ka ‘rasiḳh’
ham samajhte hain ye andaz-e-saval achchha hai
Leave a Reply