kahan ham rahe phir kahan dil rahega
isi tarah gar tu muqabil rahega
khuli jab girah band-e-hasti ki tujh se
to uqda koi phir na mushkil rahega
dil-e-khalq men tukhm ehsan ke bo le
yahi kisht-e-duniya ka hasil rahega
hijab-e-khudi uth gaya jab ki dil se
to parda koi phir na haael rahega
na pahunchega maqsad ko kam-himmati se
jo salik talabgar-e-manzil rahega
na hoga tu agah irfan-e-haq se
gar apni haqiqat se ghafil rahega
khafa mat ho ‘bedar’ andesha kya hai
mila gar na vo aaj kal mil rahega