Ali Ahmad Jalili
fareb-e-nik.hat-o-gulzar se bachao mujhe
karam karo kisi sahra men chhoḌ aao mujhe
vo jins huun main jise bik ke muddaten guzrin
jo ho sake to kahin se ḳharid laao mujhe
machal rahi hai nazar chhu ke dekhiye us ko
simaT raha hai badan haath mat lagao mujhe
kisi tarah in andheron ki umr to kam ho
jalane vaalo zara der tak jalao mujhe
kisi pe apne siva ab nazar nahin paḌti
miri nigah se ai dosto bachao mujhe
ye kis ki laash liye jaate ho uTha.e hue
kahin vo main to nahin huun zara dikhao mujhe
bikhar chuka huun ‘ali’ main ghazal ke sheron men
bisat-e-ariz-o-lab se sameT laao mujhe
Leave a Reply