taron se aur baat men kamtar nahin huun main
jugnu huun is liye bhi falak par nahin huun main
sadmon ki barishen mujhe kuchh to ghula.enge
putla huun ḳhaak ka koi patthar nahin huun main
dariya-e-gham men barf ke tuude ki shakl men
muddat se apne qad ke barabar nahin huun main
us ka ḳhayal us ki zaban us ke tazkire
us ke qafas se aaj bhi bahar nahin huun main
main tishnagi ke shahr pe TukḌa huun abr ka
koi gila nahin ki samundar nahin huun main
kyuun zahr zindagi ne pilaya mujhe ‘mayank’
vo bhi to janti thi ki shankar nahin huun main
Leave a Reply