ham ko apni zindagi men dard-e-kamil chahiye
har nafas ik shor-e-naghmat-e-salasil chahiye
zaḳhm-e-dil ka haal ham kis ko suna.en dosto
aisi baten sunne vaala ham sa gha.il chahiye
kal vahi ban ja.enge yaaro hamare charagar
aaj har lamha jinhen ik raqs-e-bismil chahiye
jis men raqsan ho ḳhushi vo dil mubarak ho tumhen
nazish-e-dard-o-alam ho ham ko vo dil chahiye
ai ‘niyazi’ kis tarah kar len qubul asaniyan
ham ko jiine ke liye har gaam mushkil chahiye
Leave a Reply